B A L O K
Oleh : Shaff Ra Alisyahbana Dt Malako
Sanak,Dosanak dan Badosanak kasadonyo. Alah lamo kito indak basuo lewat internet ko dan dek kini maso ba Aghi Ghayo,dimano banyak sanak kito nan pulang kampuong untuok MALAGAK yaitu Maso Lapeh Taragak.
Sambie makan lamang jo tapei,alu pade,katupek sipuluik atou cetakan, sagun bakar,kabek kayu dan lainnyo,mari kito Ayo Main di Sanggar dalam curito BALOK.
BALOK ko bukan nan artis Minang nan samo Faisal tu, tapi balok nan bilo sakulilieng sabuah kayu di gargaji ampek sagi nan ba ukuran panjang.
Caritonyo bak iko :
Pado tahun 1976, panulis pai sumando ka Ranah Tamang dek karano disitu dapek jodoh jo sorang Gadih Minang asa Bukik Ayie Manih Padang Salatan, tapi umaknyo (mintuo ambo) adolah urang Kampuong Tangah.
Dihalam rumah mintuo tu nan tanamo disitu Rumah Gadang, ado sorang gaek nan karajonyo mameloki nan rusak-rusak sa umpamo jam tangan, jam beker,jam dindieng dan radio. Namo gaek tu adolah Pangulu, tapi namo aslinyo panulis indak tau do. Banyak juo urang nan mampapelokkan jam tangan dan pakakeh lainnyo disitu. Apobilo inyo mulei bakarajo, inyo pasang taropong nan disalekkan diantaro kalipik mato nan sabalah. Jadi sado nan nampak dinyo diamto sabalah tu sadonyo gadang,sainggo inyo dapek maliek pakakeh-pakakeh nan aluih-aluih di barang nan dipelokinyo tu.
Pado suatu hari, dek paruik gaek ko alah ado pesta timuo tangah, tadanga dinyo dari dalam paruiknyo luguoh lagah bunyi urang bacakak hantam mahantam, inyo saoklah pakakeh tukangnyo jo kain basahan dan inyopun pai nandak pulang makan.
Kutiko tagak dari dakek meja operasinyo, inyo ma angkek kakinyo tenggi-tenggi nan malompeki sabuah balok nan nampak dinyo tabulintang dimukonyo. Tantu urang lain tacangang mancaliek pak Pangulu nan malompek tenggi tu, sabab dimukonyo indak ado apo-apo do.
Tahu sanak mangapo tajadi sarupo itu ???
Rupnyo inyo lupo mambukak taropong nan tapasang di matonyo dan inyo mancaliek sabuah anak korek api nan dicalieknyo sagadang balok tu dan dek itulah mamngkonyo inyo malompek.
Dek karano nan mancaliek inyo galak takekeh-kekeh, disatoinyo pulo galak basamo-samo.
Galak urang,galak awak.Padahal nan galakkan urang, awak.
Antahlah ......hikk...hikk....hikk....hikkkkkkkk.......huuuuk.
