Oleh : Shaff Ra Alisyahbana Dt Malako
Sanak,Dosanak dan Badosanak nan barado di kampuong ilaman dan diparantoan. Untuok malapehkan taragak Sanak,Dosanak dan badosanak kito nan barado di parantoan, kami muekkan babagei curito nyato nan tajadi di Ranah Nata dan bisa manggulitik paruik kito dek ado kalucuan atou humornyo saketek dalam blokspot “ Ayo Main di Sanggar “.
Untuok pambukak curito ambo curitokan kajadian di tahun 1970an, antaro Pak Ehok jo Pak Radin. Jadi, kalou sanak galak jan sampei maraeh atou barayie mato, mak jangan dikecekkan urang manangih, taragak pulang mancaliek kampuong ilaman, sabab tonggak rumah alah dipanjek aka bulu dan janjangpun alah ditumbui lumuik. Aaa… bak iko curitonyo …..
Pak Ehok adolah sorang pandatang nan mambukak usao lapou kopi di dakek gudang garam di Pasa Jirak jo padusinyo nan alim dek karano indak lakang tingkuluok dari kapalonyo. Tapi, … nan sabananyo adolah ……. (rasio sanak ei… ). Pak Ehok ditakadiekan Allah suaronyo agal mambaok ka iduong alias “ langie “.
Pado suatu ari datanglah Pak Radin dari Panggautan, dimano inyoko pun sarupo nada suaronyo jo Pak Ehok. Kutiko inyo masuok lapou kopi, inyo mintak kopi jo pacal, lalu Pak Radin bakato ….
Faak….! Kofi samangkhuok…, fasal sa firieng. Pak Ehok manjawab… Afoo..?? Afo kato waang..?? Subo ‘ulangi sakhali lai..
Pak Radin manjawab : Khofi samangkhuok dan fasal sapirieng. Pak Ehok naiek berang dan bakato dakek Pak Radin.. Waang himak hambo ndeh ? Fandang hentieng waang dakhek hambo dek hamboko uhang fandatang. Pak Radin manjawab .. Hindak Fak.., Hambiekkhanlah…. Hambo hala lafa bana ko.
Untuong sajo ado nan datang nandak minum kasitu sambie malarei patangkaan antaro Pak Ehok jo Pak Radin dan bakato kadakek Pak Ehok .. Eee… Pak , Kalian samo Pak. Samo langie kalian kaduonyo.
Pak Ehok manjawab ; Hiyoo….., hantalah. Salah faham hambo, lalu inyo mintak maaf dakek Pak Radin sambie basalam-salaman.
Tidak ada komentar:
Posting Komentar